Informashon di Wikipedia.

• 
  Lèter di pinda, òf lèterchi, ta un kuki típiko antiano traha di pinda i speserei. E kuki aki a originá for di Kòrsou, i ta wòrdu sirbi durante un entiero, bishita, òf fiesta (p.e., boutismo, òf komunion). E lèter di pinda por en general wòrdu distingui pa su forma di un lèter 'S'. E orígen di e forma di e lèter di pinda no ta sigur. Tin varios teoria pa su forma. E promé, ta ku e kuki ta hòrna igual, no tin un huki of partinan di e mansa ku ta krusa otro. Ademas, ariba e djaluna di Dia di Resurekshon, nan ta selebrá un fiesta tradishonal di kosecha, yamá seú, den kual pinda ta hunga un rol importante. Ta p’esei, na honor di seú, e lèter di pinda ta wòrdu horná den forma di e promé lèter di e selebrashon. Tambe, un otro teoria ta indiká ku den siglo 17 e pueblo Hudiu a trese e kuki pa Kòrsou. E forma 'S' ta para pa Seder. Seder ta un fiesta den sírkulonan hudiu pa selebrá e huimentu for di Egipto. E lèter di pinda ta konsistí prinsipalmente di pinda (tota, pelá i mulá), hariña, baking powder, speserei (seya kané òf/i klabu mulá), suku blanku, webu, manteka, salu, i esensia di vanila i amandel. E ingredientenan seku i muhá ta wòrdu mesklá separá promé ku nan wòrdu agrega hunto pa krea e mansa di kuki. Por ehempel, e suku ku manteka ta wòrdu bati hunto te oro e forma un krema nubiá. E mansa ta wòrdu proporshoná den balanan na tamaño di un walnoot. Kada bala ta wòrdu lorá den forma di un kolebra di 15 centimeter largu. E kuki ta wòrdu horná na 180°C pa 25 minút te ora e yega na un tekstura bros i brúin di koló.